నేర్పుదాం - నేర్చుకుందాం

నేర్చుకున్నది నేర్పితే మరింత నేర్పరితనం పెరుగుతుంది. మనం నేర్చుకున్న విషయాలు మనకు గుర్తుండాలన్నా, అవి మరింత లోతుగా అర్ధం కావాలన్నా ఆ విషయాలను ఇతరులకు నేర్పాలి. నేర్పుతుంటేనే నేర్పడం తెలుస్తుంది. మెరుగుపడుతుంది.  ఈ లోకంలో దొంగతనానికి గురికానిది పంచేకొద్దీ వన్నె పెరిగేదీ 'జ్ఞానం' మాత్రమే.

ఒక విషయం మనకు అర్ధమయినట్లే ఉంటుంది. కానీ ఇతరులకు చెప్పాలన్నా, పేపర్ పై పెట్టాలన్నా, ఇతరులతో చర్చ సందర్భంగా సమాధానం చెప్పాలన్నా మనం తడబడుతున్నామంటే దానర్ధం ఆ విషయం పై మనం పూర్తి పట్టు సాధించలేదని అర్ధం. తినగ తినగ వేము తీయనవుతుంది. అనగననగ రాగమతిశయిల్లుతుందనే వేమన చెప్పిన అనుభవపూర్వక నీతి జ్ఞానానికి కూడా వర్తిస్తుంది. పైగా రాగం మనలో టేలెంట్ ఉన్నంత వరకే రాణించగలం . జ్ఞానం నేర్చుకున్న కొద్దీ విస్తరిస్తూ ఉంటుంది.

ఒక విషయంను మనం ఎదుటివారికి అర్ధమయ్యేలా చెప్పలేకపోతున్నామంటే ఆ విషయం మనకు పూర్తిగా అవగాహన కాలేదని గమనించాలని ఐనిస్టీన్ అంటాడు . 

మనకు తెలిసిన విషయం మనకు ఎంత తెలుసు అనే విషయం మనకు ఎలా తెలుస్తుంది ?మొదటిది ఇతరులకు మనకు తెలిసిన విషయాలు చెప్పేటప్పుడు, రెండవది మనకు తెలిసిన విషయాన్ని ఒక ఐటెం రూపం లో వ్రాసేటప్పుడు, మూడోది ఇతరులతో చర్చలో పాల్గొన్నప్పుడు .

అయితే ఇలా చేసేటప్పుడు మన లోపం తెలుసుకోవడమంటే మనం ఆ విషయాన్ని మరింత మెరుగు పరచుకోవడమే తప్ప ఓడిపోయినట్లో, ఇన్ఫీరియారిటీ కాంప్లెక్ష్ కు గురికావడమో, ఇతరుల ముందు తక్కువ కావడమో అనే భావానికి  గురి కాకూడదు. ఈ ప్రపంచం లో అందరికీ అన్ని విషయాలు ఎప్పటికీ తెలిసే అవకాశం లేదనేది గుర్తు పెట్టుకోవాలి. 

మనకు తెలిసిందే సరయినదని మొండివాదన చేయకూడదు. శాస్త్రీయంగా ఒక విషయం మనకు నిర్ధారణగా తెలిసినప్పుడు ఎంతైనా వాదించేందుకు జంక కూడదు. అదే సందర్భం లో ఎదుటివారు మనకంటే మెరుగైన వాదనను ఆధారాలతో శాస్త్రీయంగా చెప్పగలిగినప్పుడు నేర్చుకునేందుకు సంశయించకూడదు. ఎవరికీ అన్ని విషయాలు తెలియవు. ఎవరికి ఏ విషయం తెలిసినా అది సమాజం నుండే అనేది నిర్వివాదాంశం. ఎప్పటికప్పుడు సమాచారం ను అప్డేట్ చేసుకోవాలి. అది సమాజానికి ఉపయోగకరమే అవుతుంది. విషయాలను మంచిగా నేర్పగలిగే ఓ ఉపాధ్యాయుడుని సమాజం పొందినట్లవుతుంది. ప్రతీదీ ఎప్పటికప్పుడు మారుతూ మెరుగవుతూ ఉంటుంది. వాటిని అప్డేట్ చేసుకోవాలన్నా ఇతరులతో చర్చించాల్సిందే. అసలు మనకు తెలిసిన విషయం ఇతరులతో చర్చించకుంటే మనం మరచిపోయే ప్రమాదమూ ఉంటుంది.

కొందరు మొండివాదన చేసేవారు - తమకు మాత్రమే విషయాలు బాగా అర్ధమవుతాయనుకునే వారూ - ఎదుటివారు చెప్పేది వినని వారు - ఇతరులపైనా , కొన్ని విషయాలపైనా మూర్ఖంగా గుడ్డి వ్యతిరేకత పెంచుకున్న వాళ్లు ఉంటారు. వారితో చర్చించడం వల్ల ఉపయోగముండదు. కావాలని అలా ప్రవర్తించే వారికి దూరంగా ఉండడమే మంచిది. ఎందుకంటే అటువంటి వారితో చర్చ సమయాన్ని వృధా + మనం డిస్టర్బ్ కావడం జరుగుతుంది. మనం ఎంత ప్రయత్నించినా వీళ్లు మారరు అనే నిర్ధారణకు వచ్చిన వారికి దూరంగా ఉండడం వల్ల ఆ సమయంతో మరికొన్ని ప్రయొజనకరమైన పనులు చేపట్టవచ్చు.

చర్చ సందర్భంగా లేదా ఏదైనా కొత్త విషయాన్ని నేర్చుకునేటప్పుడు గుడ్డిగా అనుసరించకూడదు. దానికో శాస్త్రీయ పద్ధతిని అనుసరించాల్సి ఉంటుంది. తెలుసుకున్నది నిర్ధారించుకోవాలి. నిర్ధారించుకున్నది నిరంతర చర్చల ద్వారా మరింత అవగాహన చేసుకుంటే ఇతరులకు మరింత తేలికగా చెప్పేందుకు వీలవుతుంది.

మొత్తం మీద మనం నిరంతరం నేర్చుకోవాలి. నిరంతరం విద్యార్ధిగానే ఉండాలి. అప్పుడే మంచి ఉపాధ్యాయుడిగా - వక్తగా  - రచయితగా మారే అవకాశం ఉంది. అలా చేయడమంటే సమాజానికి మేలు చేయడమే అవుతుంది. ఎందుకంటే మంచి భావాలు ఎంతగా వ్యాపిస్తే  సమాజంలో పౌరులు అంత మంచిగా తయారవుతారు. మరింత మెరుగ్గా మానవత్వపు విలువలు పరిఢవిల్లుతాయి.

- Palla Kondala Rao,

20-11-2013.